L'ANZAC Memorial ye un memorial adedicau a os herois de guerra australianos y neozelandeses que formaban l'ANZAC (Australian and New Zealand Army Corps) en a I Guerra Mundial (1914-1918). O Memorial se troba en o Hyde Park de Sydney, Australia.
O 25 d'abril de 1916, en o primer cabo d'anyo d'o desembarque d'as fuerzas australianas en Turquía, s'ubrió un fundo ta recaudar diners ta devantar un memorial permanent en homenache a las tropas australianas y neozelandesas. En rematar a Guerra, o fundo ya heba recaudau 60.000£. Bi heba, manimenos, manca de consenso sobre a forma y a localización d'o molimento.
En 1923, fue aprevau l'ANZAC Memorial y presa a decisión oficial de construyir o molimento en o Hyde Park, en Sydney. O Parlamento sancionó o prochecto de construcción en o suyo puesto actual en 1929. Se creyó un concurso ta decidir a forma que tendría o memorial. Se presentoron un total de 117 prochectos provenients de tot o mundo. O 9 de chulio de 1930, o premio fue anunciau, estando C. Bruce Dellit o vencedor. A construción prencipió en noviembre de 1931 con a interpresa Kell and Rigby Pty Ltd como constructora.
A piedra prencipal fue mesa o 19 de chulio de 1932. O memorial fue rematau en 1934. Bells elementos d'o procheto orichinal habioron d'estar eliminaus debiu a l'alto coste. O Memorial fue oficialment enguerau por a Suya Alteza Reyal, o Duque de Gloucerster o 24 de noviembre de 1934.
O Memorial ye localizau en o extremo sud d'o Hyde Park en l'este d'o districto d'afers central de Sydney, ye en iste puesto a on se fan as celebracions de l'ANZAC Day, d'o Día de l'Armisticio y atras importantes ocasions.
Prochetau por C. Bruce Dellit, o memorial fue rematau en 1934 y adornau con figuras y esculturas monumentals por Rayner Hoff. O Memorial ye o millor molimento publico en estilo Art Déco d'Australia.
O molimento ye de cimento, con o exterior en granito, consistindo en una masiva superestrutura con columnas exteriors que sustentan esculturas, con grans finestras arqueadas con vidrio amarillenco en cada cara, con un teito inspirado en un zigurat.
O interior ye amplament composau por marbre blanco, con un teito en forma de cupula adornada con 120.000 estrelas doradas - cadaguna representa un voluntario de guerra de Nueva Galas d'o Sud. L'acesso a o salón prencipal se fa a traviés d'escaleras por os estremos norte y sud, mientres que l'acceso a o piso baixo se fa por as dentradas ueste y este a on bi ha un museu con decumentos, uniformes y periodicos historicos.
A parti más intresant d'o interior ye a monumental escultura de bronze de Rayner Hoff, representando un soldau, refirmau en o suyo escudo por a suya mai, chirmana y muller. A fegura masculina ye espullada, feito que no fació goyo a bellas personas d'a epoca d'a suya construcción, estando a más un caso unico en o mundo en un memorial de guerra. Bi heba atras dos figuras controvertidas disenyadas por Hoff - una con una muller espullada - que nunca no fuoron instaladas en as fronteras este y ueste, debiu a la oposición d'os representants d'a Ilesia Catolica local.
O exterior d'o molimento ye adornau por bellas figuras de bronze, incluyindo-ie as 20 d'as partis superiors d'as columnas taién feitas por Hoff.
A o norte en o Memorial, bi ha un gran laco rectangular dito Lake of Reflections con ringleras d'alamos. Os alamos, que no son nativos d'Australia, simbolizan as zonas de Francia a on luitoron as tropas australianas. En o prochecto orichinal todas as fronteras habrían de tener debant as ringleras d'alamos con un laco, encara que nunca no se construyioron.
