Murbiedro u Sagunto (Sagunt autualment en catalán e istoricament Morvedre; Sagunto autualment en castellán e istoricament Murviedro) ye un monezipio de la probinzia de Balenzia, situato en la comarca de lo Campo de Murbiedro. La suya poblazión ye de 62.702 abitants (2006), en una superfizie de 132 km² con una densidat de poblazión de 475,02 ab/km².
Estió fundato en l'añada 219 aC. Ya se parla de la ziudat de Sagunto en bels testos de la literatura clasica, relazionando-la con cosas que pasoron en la Segunda Guerra Punica. Esta ziudat ibero-edetana yera conoxita como Arse pero con lo tiempo esdebendría la ziudat ispanorromana de SAGUNTUM. La istoria de Sagunto como ziudat portuaria ye muito estensa, ya en lo sieglo III aC (n'ixa epoca una ziudat d'orichen griego e aliata de Roma) yera un punto estratechico en lo comerzio por la mar Mediterrania. Ya en ixa epoca comerzians de Sagunto bibiban istalatos á man de lo Puerto (fuera de la ziudat amurallata), pa fer prosteros lurs comerzios á costa de los mariners que plegaban ta Sagunto. Este puerto antigo ye l'autual bico dito Grau Vell.
Lo cheneral Aníbal setió la ziudat ibero-edetana d'Arse en l'año 219 aC por la suya situazión estratechica. Lo setio duró meses, e los abitadors d'Arse basoron lur estratechia en que Aníbal no podería atrabesar las grans murallas arredol la ziudat en poco tiempo. Encara que la chent de las redoladas á man d'Arse no los aduyoron, podioron resistir los ataques cartachineses. La situación se fazió insostenible dimpués que los romans se negasen á nimbiar aduya. La ziudat desmoralizata podió resistir bels meses més, debant un exerzito més gran en lumero e en recursos.
En a epoca de dominio musulmán la decadenzia de l'antiga ziudat romana yera gran, fendo-se més gran Balenzia. N'esta epoca ya no se diziba Sagunto e s'emplegaba Morbyter e bariants. O toponimo SAGUNTUM probablement perbibió en o nombre d'a comarca Bal de Segón. Morbyter bien de lo latín MURI VETERES que quier dizir muros viellos. Los aragoneses adautoron este toponimo mozarabe como Murviedro e los catalans lo adautoron como Morvedre.
En 1868, lo nuebo Gobierno Provisional modificó lo nombre de la ziudat, dita Murviedro dende feba més de diez sieglos, por l'antigo nombre román de Sagunto, seguindo los canons romanticos e clasizistas de la epoca: se restituyó a Murviedro el glorioso nombre de Sagunto.
