A necropolis de Chiza se troba en l'altiplán de Chiza, en a redolada d'o Cairo, en Echipto. En ista necropolis de l'antigo Echipto se construyó a piramide de Kheops, tamién conoxita como a Gran Piramide, a piramide de Kefren e a relatibament chicota piramide de Mizerín, chunto con dibersas piramides subsidiarias menors, templos funerarios e a Gran Esfinche.
D'as tres piramides prenzipals se conserba o suyo nuclio, formato por bloques de piedra calsinera, pero d'a suya crosta, de calsinera polita u granito rosato, nomás en quedan bellas restas, ya que istos bloques s'emplegoron ta construyir edifizios en a bezina ziudat d'o Cairo. A piramide de Kefren parixe a más alta, pero ye debito á que se construyó sobre una zona más elebata en l'altiplán de Giza; en reyalidat ye a de Kheops a de mayor altaria e bolumen.
A necropolis de Giza ye a más gran de l'Antigo Echipto, con sepolturas que datan d'as primeras dinastías. Á finals d'o Imperio Antigo, mientres d'a seisena Dinastia eba en Giza bels cuantos zentenars de sepolturas. Gosó tener o suyo masimo esplendor mientres d'a cuatrena dinastía, cuan se construyioron a piramide de Jufu (Kheops), a piramide de Jafra (Kefren) e a relatibament chicota piramide de Menkaura (Mizerín), chunto con dibersas subsidiarias menors, templos funerarios, templos d'a bal, embarcadors, calzatas prozesionals e fuesas contenindo barcas solars zeremonials. Tamién se esculpió en a roca de l'altiplán a Gran Esfinche. Asoziatos á istos molimentos reyals se troban numeroras mastabas de miembros d'a familia reyal, atras conzeditas por o faraón á funzionarios e sazerdoz, e bels molimentos d'epocas posteriors relazionatos con o culto á los debantpasatos.
A Gran Piramide yera considerata en l'antigüidat una d'as Siete Marabiellas d'o Mundo, e ye a unica d'as siet que encara esiste. En 1979, o conchunto de Menfis con as suyas necropolis e piramides (Chiza, Abusir al-Melek, Saqqara e Dashur) fue declarato Patrimonio d'a Umanidat por a Unesco, con o nombre de Menfis e a suya necropolis, a zona d'as piramides dende Giza dica Dahshur. Ye catalogata como un patrimonio de tipo cultural.