O puent d'a badía de Sydney (en anglés Sydney Harbour Bridge) ye un puent de fierro d'un solo arco ta ferrocarril, vehiclos, becicletas y viandants que une o sud y o norte d'a ciudat de Sydney a traviés d'a badía de Sydney. A espectacular anvista d'o puent, con o puerto y o edificio d'a Opera de Sydney ye un icono conoixiu arredol d'o mundo tanto d'a ciudat como de toda Australia. Os habitants d'a ciudatz dicen familiarment a o puent o "pencha-ropa", por a suya forma caracteristica.
Baixo a dirección d'o incheniero John Bradfield, d'o Departamento d'Obras Publicas d'o estau de Nueva Galas d'o Sud, o puent fue disenyau y construyiu por a interpresa Dorman Long, de Middlesbrough (Anglaterra). Prencipió a construyir-se o 28 de chulio de 1923 y se remató o 19 de chinero de 1932. Finalment, fue inaugurau o 19 de marzo siguient. Seguntes o Guinness World Records, ye o puent con una luz mas ampla d'o mundo. Tamién ye o cinqueno puent d'arco mas largo d'o mundo, y o puent d'arco de fierro mas alto d'o mundo, con una altaria de 134 metros dende o libel de l'augua. Amás, dica l'anyo 1967 estió a estructura mas alta de Sydney. O paso por o puent suposa o pago d'un peache.