Tres Serols (en anglés Three Sisters) ye o nombre con que se conoixe a una rariza formación rocosa situada en os Monts Azuls en o estau de Nueva Galas d'o Sud, Australia, en a parti norte d'a val de Jamison. Se troban amán d'a localidat de Katoomba y son una d'as atraccions mas famosas d'os Monts Azuls. Os suyos nombres son Meehni (922 m), Wimlah (918 m) y Gunnedoo (906 m).
As Tres Serols se formoron por a erosión d'o terreno. A piedra d'arena blanda d'os Monts Azuls s'erosionó facilment con o paso d'o tiempo debiu a l'aición de l'aire, a plevia y os ríos, fendo que as foces que rodiaban a val de Jamison se fuesen crebando.
A leyenda mas famosa diz que as Tres Serols yeran tres chirmanas, Meehni, Wimlah y Gunnedoo, miembros d'a tribu katoomba que habitaba en a val de Jamison. As tres s'enamororon de tres hombres, chirmans, d'a vecina tribu nepean, encara que o suyo matrimonio yera viedau por as leis tribals. Os tres chirmans no yeran d'alcuerdo con dita lei y no quereban aceptar-la por o que decicioron raptar a las tres chirmanas. Isto derivó en una gran batalla tribal, estando as tres chirmanas convertidas en piedra por un anciano d'a suya tribu ta protecher-las. O viello manimenos morió en a batalla y dengún no pudo tornar a las chirmanas a o suyo estau orichinal. Se diz que ista leyenda perteneixe a la mitolochía d'os indichenas australians.
Con tot y con ixo, o Doctor Martin Thomas, en a suya obra "The artificial horizon: imagining the Blue Mountains", contrimostra que a teorica leyenda "aborichen" sería en realidat una falordia inventada por un habitant no aborichen de Katoomba, Mel Ward, presumiblement ta adhibir intrés toristico a iste puesto. A historia s'orichinó en zaguerías d'os anyos 1920 u primerías d'os anyos 1930 y no se conoixeba antis.